ИМЕЛИ СУЖДЕНИЕ о порядке утверждения богослужебных текстов местночтимым святым.
ПОСТАНОВИЛИ:
|
СЛУШАЛИ:
Рапорты Преосвященного митрополита Петрозаводского и Карельского Константина, председателя Синодальной богослужебной комиссии, и Преосвященного митрополита Калужского и Боровского Климента, председателя Издательского Совета Русской Православной Церкви, о представлении на утверждение Священного Синода ряда богослужебных текстов и текстов акафистов.
ПОСТАНОВИЛИ:
Месяца ноября в 25-й день Священномученика Серафима (Остроумова), архиепископа Смоленскаго Тропaрь, глaс 4:
Апостольскаго служения преемник быв,/ слово Христовы истины право правил еси,/ веры же ради гонения и страдания претерпев,/ на высоту боговедения возшел еси,/ сего ради и венцем мученическим украсился еси,/ Серафиме премудре./ Молися Господеви о спасении душ наших.
Кондак, глас 3:
Яко иерарх усердно Церкви Христовей послужив,/ путем исповедания веры небоязненно шествовал еси,/ огнь богоборчества угашая и соблазн разделений любовию врачуя,/ пастырь добрый стаду твоему явился еси./ Сего ради умильно вопием:/ от бед и скорбей сохраняй нас молитвами твоими,/ святителю Серафиме досточудне.
Месяца ноября в 14-день Священномученика Георгия Извекова Тропaрь, глaс 2:
Православныя веры ревнителю/ и твердый ея исповедниче,/ священномучениче Георгие,/ в сердце твоем присно Христа воспевая,/ пения церковная слагал еси/ и, всеусердно Богу послужив,/ венец мученический от Него приял еси./ Темже непрестанно Господа моли/ Церковь Русскую в мире сохранити,/ единомыслие людям даровати/ и спасти души наша.
Кондак, глас 5:
Звездо новая Церкве Русския,/ воспевателю славы Божия,/ алтаря Господня непорочный служителю,/ юных наставниче и воинов окормителю,/ священномучениче Георгие./ Ты, Духа Святаго исполнився,/ гонителем мужественне рекл еси:/ готов есмь пострадати и умрети за Христа./ Темже, заточения и смерть небоязненно восприем,/ ныне с лики новомучеников на Небеси пребываеши/ и молишися о спасении душ наших.
Месяца марта в 13-день Священномученика Николая Попова Тропaрь, глaс 2:
Явердым веры исповеданием,/ святый Николай яко крин посреде терния во страдании своем процвете / и благоуханием веселит верных сердца,/ благочестию святых в вере того подражающих./ Егоже молитвами, Христе Боже,/ спаси души наша.
Кондак, глас 3:
Христу Пастыреначальнику в служении своем подражая,/ во вся дни душу свою за чада духовная полагал еси,/ священномучениче Николае,/ темже, страданием в Небесная селения водворився,/ тепле молиши о нас Превечнаго Бога.
Месяца сентября в 19-й день Преподобномученицы Марии (Мамонтовой-Шашиной) Тропaрь, глaс 5:
Христа Господа Иисуса верная ученице,/ Пресвятыя Богородицы смиренная послушнице,/ преподобная страстотерпице Марие,/ легкое иго и язвы Господни любовию носящи,/ лествицею мучений к Нему, яко Небесному Жениху, востекла еси,/ Егоже моли сохранитися нам во благочестии/ и спастися душам нашим.
Кондак, глас 4:
Яко крин багряновидный,/ посреде терний безбожия/ в земнем отечестве твоем процвела еси,/ преподобномученице Марие честная,/ подвиги же воздержания страданием украсивши,/ яко голубица чистая в чертог Небеснаго Жениха возлетела еси,/ Иже увенча тя красотою славы нетленныя.
Месяца марта в 18-й день Преподобномученицы Наталии (Баклановой) Тропaрь, глaс 4:
Божественным светом от юности озаренная,/ суетный и многомятежный мир оставила еси/ и, иноческое житие возлюбивши,/ во святую Новодевичию обитель вселилася еси,/ идеже чистотою жития твоего/ Господу угодила еси./ Во дни же гонения безбожнаго/ верность Христу даже до смерти запечатлевши,/ велие дерзновение у Всещедраго Бога стяжала еси,/ святая преподобномученице Наталие./ Сего ради, в вечней славе пребывающи,/ поминай нас, чтущих честная страдания твоя,/ и ограждай нас молитвами твоими.
Ин тропарь, глас тойже:
(Поется в Сходненском храме Святой Троицы)
Днесь земля Московская тобою хвалится,/ верныя же вся собирает во храм Святыя Троицы веси Сходненския,/ идеже совершается всеславная память твоя,/ святая преподобномученице Наталие./ Ты же, ныне Святей Троице предстоящи,/ молися даровати нам/ твердое во истине Христовой стояние,/ в болезнех, бедах и скорбех терпение/ и душам нашим спасение.
Кондак, глас 2:
Новодевичия обители украшение,/ земли Московския покрове и защищение,/ Православныя Церкве похвало,/ преподобномученице Наталие,/ славная исповеднице веры истинныя,/ предстоящи ныне Престолу Господа,/ не остави сестры твоя, во обители подвизающияся,/ моли Христа Бога/ оставление грехов даровати нам / и спасти души наша.
Месяца сентября в 26-й день Мученика Николая Косинскаго Тропaрь, глaс 2:
Христа всем сердцем возлюбив,/ желания плотская отвергл еси/ и, пустыннаго жития взыскуя,/ яко странник в кущи лесной вселился еси./ Егда же призва тя Бог к славе жизни вечныя,/ исповедание доброе пред гонители мужественне принесл еси/ и венец сугуб девства и мученичества от Господа приял еси./ Темже, святый мучениче Николае,/ моли Христа Бога/ спастися душам нашим.
Кондак, глас 6:
Яко древо, насажденное при исходищих вод,/ добродетельми многими процвет,/ плод терпения Христу принесл еси/ и, лютым мучителем представ,/ образ истиннаго смирения явил еси/ и веру Православную твердо исповедал еси./ Сего ради восхваляем тя, вопиюще:/ радуйся, святый мучениче Николае,/ веси Косинския украшение.
|